TAUN ANYAR
E. Hasanah
Teu karaos ayena taun anyar
Sujud syukur ka gusti nu maha akbar
Nikmat dunya terutami badan nu cenghar.
Ras ka diri nu loba ku tuna
Bet mempar tina aturanna
Agama teu acan sampurna
Darigama komo loba lalina.
Ras ka raga nu harita tanginas
Awak hampang jagjag waringkas
Panangan parigel tetenjoan bengras
Ayena kari nyawang mangsa anu lawas
Bet hate nyeredet ku rupa gupay kawaas
Mapay itungan teu karaos yuswa nambahan
Sesa jatah hirup pasti ditangtosken ku pangeran
Nyawang kaendahan dina lakon nu bakal karandapan
Raga ngamimitian surti dina umur nu beuki ngurangan
Saban lengkah ngajugjug tungtung pangumbaraan
Sabari nitenan sagala rupi anu cenah tuntunan.
Gusti gening loba tikosewad tina pagu tatanan
Lampah anu hade bet loba teu kacumponan
Pangaweruh nu katarima teu kabadanan
Loba kawates ku tunana kamampuan
Aya niat seja meaken panasaran.
Saayat nu mawa hate kagagas
Ngerem hate nu bangblas
Tina kalakuan nu bablas
Mugi ngajagi tina labas.
Ngajerit Allahu akbar
Mundut ka nu maha benghar
Ampunan ridho dina taun anyar.
Sukabumi, 1 Muharam 1443 H.
